Bendera ya taifa si kitambaa cha kawaida kinachotumika kama mapambo. Ni alama ya heshima, mshikamanisho wa taifa na kiwakilishi cha historia, uhuru na utu wa watu wa Kenya. Kwa Wakenya, bendera ndiyo ishara kuu ya utaifa wao, inayokusanya pamoja mila, tamaduni, na mapambano ya waliotangulia katika safari ya kupigania uhuru.
Hata hivyo, imekuwa jambo la kusikitisha kuona vijana wawili wakikamatwa kwa kosa la kukosea bendera ya Kenya heshima. Kitendo chao kimeibua mjadala mkubwa kuhusu nafasi ya kizazi kipya katika kuenzi na kulinda alama za taifa. Wakati mwingine vijana hufanya mambo kwa mzaha au kutafuta umaarufu katika mitandao ya kijamii, bila kufikiria matokeo yake kisheria na kijamii.
Sheria za Kenya ziko wazi. Bendera ya taifa inalindwa na Katiba na pia na Sheria ya Nembo za Taifa, ambayo inakataza matumizi mabaya ya alama kama bendera, wimbo wa taifa na nembo ya taifa. Kwa hivyo, yeyote anayeidhalilisha au kuitumia vibaya anaweza kushitakiwa. Hatua ya kukamatwa kwa vijana hawa ni kumbusho kuwa uhuru wa kujieleza una mipaka pale unapogusa alama zinazotambulisha taifa.
Kukamatwa kwao pia kunafungua mjadala wa malezi ya kizalendo. Je, vijana wanapewa nafasi ya kutambua thamani ya alama za taifa mashuleni na katika jamii? Je, taifa linawekeza vya kutosha katika kuwajenga vijana wawe walinzi wa heshima ya nchi yao? Matukio kama haya ni ishara kuwa elimu ya uraia na uzalendo bado inahitaji kuimarishwa.
Kwa upande mwingine, hatua ya kukamata na kushitaki inaweza kuwa fundisho si kwa vijana hao pekee bali pia kwa jamii yote. Inatufundisha kuwa bendera si pambo la burudani bali ni alama inayopaswa kutunzwa kwa heshima kubwa. Ni wajibu wa kila Mkenya kuhakikisha kuwa kizazi kijacho kinajua thamani ya bendera na kinajivunia kuitetea.
Kwa jumla, vijana hawa wawili sasa wamejikuta kwenye mkono wa sheria kwa kosa ambalo kwa mtazamo wa wengine linaweza kuonekana dogo, lakini kwa taifa ni kosa kubwa. Tukio hili liwe fundisho kwa wote kwamba heshima ya taifa huanza na heshima kwa alama zake. Kuwa mzalendo si maneno matupu; ni vitendo vya kila siku, kuanzia kwa heshima kwa bendera ya taifa.
